Pulpit tlang atangin thusawitu-in tha em em in thu a sawi dup dup a; mipui te chuan uluk em em in kan lo ngaithla thup a! Chutih lai mek chuan kawtthler ah tu te emaw au rinna (microphone) nen Pathian thu tha em em a rawn sawi ve bawk a! Khawhar in ah han kal ila, tu te emaw ni chuan thu tha em em mai a lo sawi ve bawk a! T.V han thlir ila, channel hrang hrang ah Pathian thu tha em em mai ngaihthlak sen loh an lo chhuah ve mek bawk a!

Chung te chuan enge an sawi le;
"kan hruaitu te hi alawm....chu ti kha ti...."
"kawngpui tha kan mamawh..."
"electric mawlh hi..."
"sual i sim ang u..."
"Pathian in min hrem dawn..."

Kan ram ah hian thu tha hi , thal lai a romei a zam chiai ang mai hian a zam nuaih nuaih a ni ber e! Ngaihthlak sen loh, zawm vek sen loh! Keini ai a thu tha dawng tam ram leh hnam hi van hnuaiah hian an awm bik kher awm lo ve! Heng kan thusawi zo zai te hi sawt pui viau ta ila chuan , kan ram hi Angel Thianghlim te chenna tlak hial a nih ve ngei a rinawm!

Mahse, chu ti chung chuan pawngsual, tualthah, eiruk , ruihhlo, tih vel ten kan nitin chanchinthar an luah khat mek tho si a! Nitin in a pung telh telh zawk chu a nih si hi!

Eiruk chung chang han sawi lan tak ah chuan , kan ram hruaitu te (an vai ni lovin) leh officer lian tak tak te hi i lo ngaihtuah ve ngai em! Khawngaihna an tlachham viau nge, mirethei tak tak te dinhmun hi an hmu phak lo!

Zin veivah nikhua a khawkar kawng khawi emaw laia , chhungkaw nu tih hriat reng reng , an fa bal hrit hret te nen ni sen sa hnuai rora (rawra) lo chhu , dam chhuah ve tum , an chan ai chu eiruk sak an ni tih hre miah lo va hah tak a , kut durh pheng phung a hna lo thawk te, motor a i han tlan pelh chang hian i ngaihtuahna a kal thui ve ngai em? I rilru no lai kha a dek ve thin em?

Kan chanai ei tu te hian han hmu ve se engtin nge an ngaih ve ang le?

Awle, insawisel kan tan leh dawn a ang!! A then in;
"chu mi te CM chuan chu ti chuan a ti...."
"an ni ram chuan chuti chuan an ti...."
"he tia tih chu a tha lo , chu tia tih hi a tha..."

Tih dan tha kan hria , kan fing tlang! Thil tha lo pawh kan hria! Ama'rawh chu , a tak a hma lak hi a tam lo a tin ni!

Ni khi en teh u, "chu mi hun ah chuan chu ti lai chu ka en ang a , chu mi hunah chu mi chu.... a tih in hre ngai em? Chutiangin, arsi te, thla te , thing leh mau te, nungchate leh Pathian thilsiam dang te hi! Siam an nih tirh a tih dan tur hrilh an nih ang khan sawi buai lovin an ti mai a, an insawisel ngai em le?

Mihring , a bik takin Mizo te hi han in en ve dawn ta ila; Hrawva'n a lo sawi ang khan , engvangin nge Pathian hian duhsakna te, thuneihna te nen , thilsiam zawng zawng chung a thunei tu a lo ruat nge a nih le?

Class-XI zirlai a kan zir ka hre reng thin; Rokunga hla, "LEI MITE HUN BI AN CHHIAR E! " tih hla chang tawp ber ,
"Chung siar lungmawl mah khian,
'Nunna eng nei la' mi lo ti;
Ngawi rengin , chetzia in i eng ve ang u! "
tih hla te kha! Mizo te tan hian a van tha tehreng em!

Chuti chuan, insawisel reng mai hi ban san ila, mahni tih tur ang amg te ti zel ila, ngawi reng hian, chetzia in i eng ve dawn teh ang u!